\begin{quotation}
Aussi durant son Empire, fut trouvé en Cypre souz un arbre, que l'on nomme Silique, le corps de S.~Barnabé Apostre, sur l'estomach duquel estoit le sainct \& sacré Evangile de l'Evangeliste sainct Matthieu, escrit de la propre main d'iceluy S.~Barnabé. A cause dequoy les Cypriens deslors commencerent d'avoir leur ville capitale Salamine franche \& libre: \& ne furent de là en avant contraincts de porter leur denombrement \& declaration en Antioche, comme ils fouloient faire au precedent. Iustinian puis apres confirma d'avantage leurs droicts, privileges \& franchises, à cause que Theodose sa femme estoit du pays de Cypre: comme luy mesme aussi porta grand honneur à sa ville Achride Iustiniane la premiere.
\end{quotation}